Feedback, Methodology, and Benefits فیڈ بیک

ڈاکٹرنذر حافی : فیڈ بیک، طریقہ کاراورفوائد : 

فیڈ بیک ایک ایسا آئینہ ہے جو کسی کو اس کی خامیوں اور خوبیوں کا جلوہ دکھا کر اُس کی بہتری کی جانب رہنمائی کرتا ہے۔گویا کسی بھی فرد، گروہ یا ادارے کی مؤثر نشوونما اور کارکردگی میں بہتری لانے  کے لیے فیڈبیک (Feedback) ایک بنیادی ذریعہ ہے۔ علمی و تحقیقی مطالعات  اس بات پر متفق ہیں کہ فیڈبیک، چاہے تعلیمی سیاق میں ہو یا پیشہ ورانہ ماحول میں، سیکھنے، خود آگاہی اور پیشہ ورانہ ترقی کو مہمیز دینے میں کلیدی کردار ادا کرتا ہے۔ یوں سمجھ لیجئے کہ  فیڈبیک ایک خود سیکھنے والے الگورڈم کی طرح کام کرتا ہے، جو مسلسل ان پٹ ڈیٹا کے تجزیے کے ذریعے اپنے آؤٹ پٹ کو بہتر بناتا ہے، اس عمل میں ماہر سسٹم﴿محقق﴾ اپنی خامیوں کو پہچان کر خود کو نئے تجربات کی بنیاد پر ایڈجسٹ کرتا ہے، تاکہ زیادہ مؤثر اور درست فیصلے کر سکے۔

بنیادی طور پر فیڈ بیک کی چاراقسام ہیں  اور  ان میں سے ہر قسم کا ایک مخصوص موقع و محل  ہے ۔

 ۱۔  ری ایکشن: ایک فوری ردعمل جیسے مچھر کے کاٹنے پر ۲۔ریفلیکس: تشخیص کرنا کہ کس طریقے سے ردعمل دیا جائے جیسے بچے کی شرارت پر ۳۔ رسپانس: حساب کتاب لگا کر ردعمل کا انتخاب کرنا     جیسے رات کے وقت دستک ہونے پر                                    ۴۔کوارڈینیشن: آپس میں ہم آہنگی کے ساتھ ردعمل دینا جیسے کسی خاندانی مسئلے یا بیرونی دشمن کا سامنا کرنے پر

اسی طرح فیڈ بیک  دیتے ہوئے  اپنے فیڈ بیک کو تین حصوں میں تقسیم کرنا چاہیے:

۱۔ اپنے پسندیدہ نکات ۲۔ اپنے  ناپسندیدہ نکات ۳۔  اپنی تجاویز

جس طرح فیڈ بیک دینا ایک ہنر ہے اُسی طرح فیڈ بیک لینا اور اُس سے درست استفادہ کرنا بھی ہر شخص کے بس کی بات نہیں۔ محققین کو فیڈبیک کی اہمیّت  کے حوالے سے مندرجہ ذیل نکات ہر گز فراموش نہیں کرنے چاہیے۔

۱۔ تحقیق کی دنیا میں ناقدین  کی اہمیّت کو سمجھیں

   فیڈ بیک  کا ہدف کسی شئے کے  صرف اثبات (affirmation) یا تردید (negation) کا معاملہ نہیں، بلکہ یہ سچائی کے کشف کرنے کی ایک کوشش ہے۔ لہذا ناقدین کے بغیر کوئی دوسرااس کوشش کو کامیاب کرنے میں مددگار نہیں ہو سکتا۔ اگر ناقدین نہ ہوں تو کسی بھی تحقیق کی خامیاں ختم یا کم نہ ہو پائیں۔  لہذا  ہر حال میں فیڈ بیک کا دروازہ کھلا رکھیں اور تحقیق کی دنیا میں ناقدین  کی اہمیّت کو سمجھیں اور علمی نقد کا استقبال کریں۔

۲۔  اپنی تحقیق سے خود ارتقا کریں

 فیڈ بیک کا عمل آپ کو یہ موقع دیتا ہے کہ آپ   تحقیق کے  سفر کو  اپنی  اندرونی علمی ترقی (epistemic growth) کا سفر بنائیں۔ یہ عمل نہ صرف تحقیقی فکری ارتقاء (research intellectual growth) بلکہ نظریاتی تبدیلی (theoretical change) کا نام بھی ہے، جس میں محقق اپنے خیالات (ideas) اور دلی احساسات (intellectual emotions) میں تبدیلیوں کا  اعتراف کرتا ہے۔کسی کے فیڈ بیک کے بعد  اپنی سابقہ غلطیوں  اور غلط نظریات کے اعتراف سے نہ گھبرائیں اور  فیڈ بیک سے آپ نے جو سیکھا ہے اُس کا اعتراف کریں تاکہ آپ اگلی منزل میں داخل ہو سکیں۔

۳۔ دلیل کا احترام اور سچائی کا دفاع

   تحقیق میں نتیجہ کبھی اپنی مرضی (personal preference) کے مطابق نہیں ہونا چاہیے۔ یہ کسی جادوئی پزیرائی (convenient shaping) کا معاملہ نہیں بلکہ حقیقت (reality) کی تشریح (interpretation) ہے، جو علمی اصولوں (academic norms) کی پابندی میں ہوتی ہے۔لہذا جو بھی ہو جائے  فیڈ بیک ملنے پر دلیل کا احترام اور سچائی کا دفاع کریں۔

۴۔  مصادیق سے بالاتر رہیں

   تحقیق کے دوران  گروہ بندی (group affiliation) نہیں بلکہ صرف نظریاتی حقیقت (theoretical reality) کا قیام ہونا چاہیے۔آپ نظریات کو اچھی طرح دلائل کے ساتھ بیان کریں تاکہ مصادیق کو لوگ خود سمجھ جائیں۔کسی کا فیڈ بیک آپ کو مصادیق کی تشخیص میں نہ الجھا دے۔

۵۔ضروری نہیں کہ ہر تحقیق درست ہو

  فیڈ بیک ہمیں یہ شعور دیتا ہے کہ ضروری نہیں کہ ہر تحقیق درست ہو ۔ یہ ایک غلط فہمی ہے کہ جو میں نے تحقیق کر لی ہے بس  وہ  ہی درست ہے۔ اب دوسروں کو چاہیے کہ وہ میری ہی تحقیق کو اپنے لئے حجّت مانیں۔کسی بھی تحقیق کے نتیجے  میں ہر وہ بات جسے ہم حقیقت ثابت کرتے ہیں، کبھی نہ کبھی اُسے مضبوط دلائل سے رد کرنے والے پیدا ہو سکتے ہیں، اور اس لچک کا اظہار کرنا دراصل علمی ایمانداری (academic integrity) کا حصہ ہے۔ درست راستہ اختیار کرنے کیلئے ضروری ہے کہ ہم  فیڈ بیک کے ذریعے غلط راستوں کو بھی پہچانتے ہوں اور یہ تسلیم کرتے ہوں کہ یہ غلط راستے ہیں۔ جس راستےکو آج ہماری تحقیق درست کہہ رہی ہے ضروری نہیں کہ کل دوسروں کی  تحقیق بھی اسے درست ہی کہے۔ فیڈ بیک ملنے پر  صرف اپنی ہی تحقیق کے درست ہونے پر اصرار نہیں کرنا چاہیے بلکہ دوسروں کی رائے کا بھی فراخدلی سے جائزہ  لینا چاہیے۔

۶۔نظریات کے تاریخی تسلسل کو سمجھنا

آج ہم جن نظریات کو  بھی سچ سمجھتے ہیں، انہیں بھی کبھی رد (reject) کیا گیا تھا۔ یہ محض فکری جدو جہد (intellectual struggle) کا نتیجہ ہے کہ ان نظریات کو آج ہم حقیقت کی علامت سمجھتے ہیں۔ یہ تاریخی تسلسل (historical continuity) ہمیں یہ سکھاتا ہے کہ  فیڈ بیک  کی وساطت سے   ہر نظریے کا مختلف زاویوں (different perspectives) سے جائزہ  لینا ممکن ہو جاتا ہے۔

۷۔ دوسروں سے زیادہ اپنے دلائل کو رد کرنے کی کوشش کریں

   جہالت کے مقابلے میں دلائل (reasoning) کا استعمال ہمیشہ علمی برتری (academic superiority) کی علامت ہوتا ہے۔لہذا  کسی بھی تحریر یا تحقیق پر موصولہ فیڈ بیک کے بعد ہمیں زیادہ سے زیادہ تحقیقی حقائق (empirical facts) کے تحت دوسروں کے بجائے  اپنے نظریات اور دلائل  کو پرکھنا اور جائزہ (examination) لیتے رہناچاہیے۔  

۸۔تعصب کے بجائے دلیل کا ساتھ دیجئے

 ضِد یا تعصب کے ساتھ کسی بات پر اصرار کرنے کے بجائے دلیل کے ساتھ انکار کرنے کو ترجیح دیجئے۔ چونکہ احمقوں کی جنت میں رہنے سے عاقلوں کی دوزخ بہتر ہے۔ فیڈ بیک کے بعد تعصب (bias) اور گروہ بندی (partisanship) سے بچنا چاہیے، اور ہر نظریے کی علمی بنیاد (intellectual foundation) کا احترام کرنا ضروری ہے۔

۹۔علمی مباحثے کی حدود عبور نہ کریں

   فیڈبیک  کبھی اپنی برتری (superiority) یا انانیت (ego) کے اظہار کا ذریعہ نہیں بننا چاہیے۔ فیڈ بیک پر ہمارا علمی مباحثہ (intellectual discourse) غیر علمی شکل اختیار نہ کرنے پائے۔ ہمیشہ  دوسرے محققین کی محنت، اور دلائل  کا  احترام کرتے ہوئے، اپنے اور  ان کے خیالات کو تجزیاتی سطح (analytical level) پر  پرکھنا چاہیے۔

۱۰۔ غیر علمی فیڈ بیک سے پرہیز

    جو لوگ فیڈ بیک کے اصول نہیں جانتے، ایسے افراد کے ساتھ تحقیقی موضوعات پر بحث کرنا دراصل علمی صلاحیتوں (intellectual abilities) کی خود کشی (self-destruction) کے مترادف ہے۔لہذاغیر علمی  فیڈ بیک سے خود بھی پرہیز کریں اوردوسروں کو بھی جواب نہ دیں۔

فیڈبیک کا عمل ایک محقق کو اپنی انا، گروہی وابستگی، اور فکری بقا کے خوف سے بالاتر ہو کر سچ کے سامنے جھکنا اور سچ سے  سیکھنا  سکھاتا ہے۔ سیکھنے کا یہ عمل  ایک اخلاقی قدر (ethical value)  ہے، جس کا حصول صرف اس وقت ممکن ہے جب ہم دلیل کو ذاتی مفاد پر، اور حقیقت کو شہرت و برتری پر مقدم رکھیں۔پس، فیڈبیک ہمیں سکھاتا ہے کہ علمی ترقی، فکری عاجزی کے بغیر ممکن نہیں۔ سچے محقق کی پہچان اس کی تحقیق کی مضبوطی میں نہیں، بلکہ اس کی اس ذہنی آمادگی میں ہے کہ وہ سچ آشکار ہو جانے کی صورت میں  ہر وقت اپنی سوچ کو بدلنے، اپنے نظریات کو ترک کرنے، اور نئی سچائیوں کو قبول کرنے کے لیے تیار رہتا ہے۔

Categories: مطالعات و تحقیقات, نذر حافی