ایرانی قائدین کی شہادت۔۔۔ سکیورٹی ناکامی یاشہادت کا انتخاب

ایرانی قائدین کی شہادت۔۔۔ سکیورٹی ناکامی یاشہادت کا انتخاب

Syed Zohaib Abbas Kazmi 

syedzohaibabbaskazmi@gmail.com

قیادت محض ایک عہدہ نہیں بلکہ ایک سوچ اور عملی رویے کا نام ہے۔ دنیا میں بظاہر قیادت کے کئی انداز نظر آتے ہیں، مگر گہرائی میں جائیں تو یہ دو بنیادی رخ اختیار کر لیتی ہے۔ ایک وہ قیادت جو فاصلے سے نظام کو کنٹرول کرتی ہے اور خود کو خطرات سے محفوظ رکھتی ہے، جبکہ دوسری وہ جو میدان میں اتر کر اپنی موجودگی سے راستہ دکھاتی ہے۔ پہلی قسم کی قیادت میں لیڈر منصوبہ بندی کرتا ہے، احکامات جاری کرتا ہے اور دوسروں کو آگے بھیج دیتا ہے۔ یہاں قیادت کا مفہوم یہ ہوتا ہے کہ “تم جاؤ”، جبکہ وہ خود پیچھے رہ کر حالات کو دیکھتا ہے۔ اس کے برعکس ایک ایسا تصور بھی موجود ہے جہاں قائد خود سب سے پہلے قدم بڑھاتا ہے اور پھر دوسروں کو اپنے ساتھ آنے کی دعوت دیتا ہے۔ یہ وہ طرزِ قیادت ہے جسے شہید قاسم سلیمانی نے دو سادہ مگر معنی خیز الفاظ میں بیان کیا: “بُرو” اور “بیا”۔ “بُرو” یعنی دوسروں کو آگے بھیجنا اور “بیا” یعنی خود آگے بڑھ کر دوسروں کو ساتھ بلانا۔ ان کے نزدیک اصل اور حقیقی قیادت “بیا” کی قیادت ہے، یعنی وہ قیادت جو صرف حکم نہیں دیتی بلکہ خود مثال بن کر سامنے آتی ہے۔ یہی وجہ تھی کہ وہ اپنے اعلیٰ عسکری مقام کے باوجود محض احکامات تک محدود نہیں رہے بلکہ عملی طور پر میدان میں موجود رہے۔

ان کی زندگی اس بات کا ثبوت تھی کہ حقیقی قائد خطرات سے بچنے کے بجائے ان کا سامنا کرتا ہے اور اپنی موجودگی سے دوسروں کو حوصلہ دیتا ہے۔ یہ طرزِ فکر کسی ایک شخصیت تک محدود نہیں بلکہ تاریخ میں بارہا دیکھنے کو ملتا ہے۔ ہر وہ قیادت جو نظریے پر کھڑی ہوتی ہے، وہ خود کو میدان سے الگ نہیں کرتی بلکہ اپنے عمل سے اپنے نظریے کو زندہ رکھتی ہے۔ اسی تناظر میں روح اللہ خمینی کی زندگی بھی ایک واضح مثال ہے۔ شدید خطرات کے باوجود انہوں نے محفوظ مقام پر جانے کے بجائے عوام کے درمیان رہنے کو ترجیح دی، کیونکہ ان کے نزدیک قیادت کا اصل مقام عوام کے درمیان ہوتا ہے، نہ کہ محفوظ دیواروں کے پیچھے۔ یہاں ایک اہم سوال پیدا ہوتا ہے کہ جب ایسی شخصیات شہید ہوتی ہیں تو کیا اسے سکیورٹی کی ناکامی کہا جا سکتا ہے؟ بظاہر یہ بات درست محسوس ہوتی ہے، مگر حقیقت اس سے کہیں زیادہ گہری ہے۔ جب کوئی قیادت “بیا” کے اصول پر چلتی ہے تو وہ خود کو خطرات سے الگ نہیں رکھ سکتی۔ وہ جان بوجھ کر ایسے راستے کا انتخاب کرتی ہے جہاں خطرہ موجود ہوتا ہے، کیونکہ یہی اس کے نظریے کا تقاضا ہوتا ہے۔ اسی لیے ایسی قیادت کے لیے شہادت محض ایک حادثہ نہیں بلکہ ایک شعوری اور نظریاتی انجام ہوتا ہے۔ وہ صرف الفاظ میں مزاحمت کا درس نہیں دیتی بلکہ اپنی جان دے کر اس درس کو عملی حقیقت میں بدل دیتی ہے۔ اگر اس پورے تصور کو سادہ الفاظ میں بیان کیا جائے تو فرق صرف اتنا ہے کہ کچھ قیادتیں خود کو بچانے کے لیے دوسروں کو آگے کرتی ہیں، جبکہ کچھ خود آگے بڑھ کر دوسروں کے لیے راستہ بناتی ہیں۔ لہٰذا ایسی شخصیات کی شہادت کو محض کمزوری یا سکیورٹی کی ناکامی قرار دینا دراصل ان کے نظریے کو نہ سمجھنے کے مترادف ہے۔ حقیقت میں یہ ایک ایسا راستہ ہے جو شعوری طور پر اختیار کیا جاتا ہے، ایک ایسا راستہ جو قربانی، نظریہ اور عملی قیادت کا مکمل اظہار ہوتا ہے۔

آپ کی پسند

ہمیں جوائن کریں

Categories: شہید خامس،, کمیونٹی کالم،