جامعۃالرضا میں شہید رہبر کی اخلاقی خصوصیات پر درسِ اخلاق
اسلام آباد: جامعۃالرضا میں شہید رہبر کے چہلم کی مناسبت سے ایک درس اخلاق کا انتظام کیا گیا۔ اس میں شہید رہبر کی اخلاقی خصوصیات کے موضوع پر حجۃالاسلام پروفیسر سید امتیاز علی رضوی صاحب نے شہید رہبر کی حیاتِ طیبہ اور ان کی نمایاں اخلاقی صفات پر تفصیلی روشنی ڈالی۔ انہوں نے کہا کہ شہید رہبر کی زندگی، خوف خدا، توکل، سادگی، تقویٰ، عزم و استقامت اور امتِ مسلمہ کی خدمت کا روشن نمونہ تھی۔
انہوں نے مزید کہا کہ شہید رہبر کی شخصیت میں خدا پر کامل توکل، غیرِ خدا سے بے خوفی اور حق کے لیے ڈٹ جانے کا عنصر نمایاں تھا۔ ان کا کہنا تھا کہ وہ ہر حال میں اللہ پر بھروسہ رکھتے اور کسی باطل قوت سے مرعوب نہ ہوتے تھے، جو ایک حقیقی مؤمن اور قائد کی پہچان ہے۔
پروفیسر رضوی صاحب نے اپنے خطاب میں دینی طلبا کے اندر بھی ان صفات کو اجاگر کرنے کی ضرورت پر زور دیا۔ انہوں نے جذبۂ شہادت اور شہداء کی خصوصیات پر روشنی ڈالتے ہوئے کہا کہ شہید رہبر کی فکر میں شہادت ایک عظیم روحانی مقام رکھتی ہے۔ انہوں نے کہا کہ شہید حق و صداقت کی راہ میں اپنی جان قربان کرکے ہمیشہ کی زندگی پاتا ہے، اور یہی جذبہ کسی بھی بیدار اور زندہ قوم کی اساس ہوتا ہے۔
انہوں نے مزید کہا کہ شہید رہبر نے اپنی عملی زندگی کے ذریعے امتِ مسلمہ کو اتحاد، بیداری، استقامت اور قربانی کا درس دیا، اور ان کی سیرت ان اعلیٰ اقدار کی عملی تفسیر ہے۔ انہوں نے کہا کہ تقوی سب کیلئے خصوصا دینی طلبا کیلئے ایک حفاظتی حصار ہے۔
آخر میں پروفیسر رضوی صاحب نے طلبا کو تلقین کی کہ وہ شہید رہبر کی سیرت و کردار میں تفکر کریں اور ان کی ذات کے مختلف ابعاد کے بارے میں سوچیں اور ان سے رہنمائی حاصل کریں، خدا پر توکل کو اپنی زندگی کا حصہ بنائیں، باطل سے نہ ڈریں اور حق کے لیے ہر قربانی دینے کا جذبہ اپنے اندر پیدا کریں۔
تقریب کے اختتام پر طلبا نے سوالات بھی پوچھے۔
.jpg)
0 comments:
ایک تبصرہ شائع کریں
اپنا پیغام لکھیں